Sikop ang tulo ka indibidwal samtang nakumpiska usab ang gibanabanang P1.35 milyon nga kantidad sa gituohang mineral ores ug usa ka van atol sa anti-illegal mining operation sa Purok 2, Barangay Amoros, El Salvador City, Misamis Oriental, alas-6:20 sa buntag niadtong Agosto 17, 2026.
Nanguna sa operasyon ang personnel sa 1st Platoon, Amoros Boundary Control Point o BCP, ubos sa 2nd Provincial Mobile Force Company sa Misamis Oriental Police Provincial Office, sa koordinasyon sa El Salvador City Police Station.
Ang mga nasikop giila lamang sa mga alyas nga “Roni,” 36 anyos, driver; “Rey,” 31 anyos, passenger; ug “Jay,” 39 anyos, passenger. Ang tulo pulos residente sa Davao de Oro.
Base sa report, gipahunong sa mga otoridad ang usa ka puti nga Toyota Hi-Ace van nga gikan sa Manticao, Misamis Oriental ug padulong sa Davao de Oro tungod sa paglapas sa seatbelt law.
Apan atol sa inspeksyon, namatikdan sa mga pulis ang pipila ka sako nga adunay sulod nga gituohang mineral ores nga klarong makita sulod sa van, lakip ang pipila nga nangatagak sa salog duol sa front seat.
Sa dugang nga pagsusi, nakit-an usab ang ubang sako sa gituohang mineral ores sa likod nga bahin sa van.
Gipangayo sa mga otoridad ang mga dokumentong nag-awtorisa sa pagbiyahe ug pag-transport sa maong mineral ores, apan napakyas ang mga pasahero sa pagpakita og balidong dokumento.
Tungod niini, gidakop ang tulo ug gikumpiska ang mga mineral ores ug ang sakyanan.
Lakip sa nakumpiska ang usa ka Toyota Hi-Ace nga adunay gibanabanang market value nga P1.219 milyon, ug 27 ka sako sa gituohang mineral ores nga gibanabanang mokantidad og P135,000.
Sa kinatibuk-an, mikabat sa P1.354 milyon ang gibanabanang kantidad sa tanang nakumpiska.
Gipabilin sa kustodiya sa El Salvador City Police Station ang mga nasikop ug posibleng atubangon nila ang kaso tungod sa paglapas sa Republic Act No. 7942 o Philippine Mining Act of 1995.
Gidala usab sa El Salvador City Police Station ang mga nakumpiska alang sa hustong pagtipig ug dokumentasyon, samtang gipaabot ang turnover niini ngadto sa Mines and Geosciences Bureau (MGB) Region 10.
Sumala sa otoridad, susihon ug beripikahon pa sa MGB Region 10 ang mga nakumpiskang gituohang mineral ores aron matino ang ilang eksaktong klase ug gigikanan.