Cebu City – Nagplano ang tulo ka polis sa San Fernando, Cebu pagsang-at og kaso batok sa usa ka babaye nga gi ingong nagpataka lang pagpasangil kanila nga nanglugos niadtong Sabado, duol sa buhatan sa kapolisan.
Ang tulo ka polis nga gidis-armahan ug gipaubos sa camp restriction mihimakak sa pasangil ug miinsister nga wa sila sa police station sa higayon nga giangkon sa babaye nga siya gipanamastamasan.
Si Brig. Gen. Ronnie Montejo, director sa Police Regional Office o PRO-7, mikompirmar nga ang tulo ka polis gi-embargohan sa armas ug gibutang sa camp restriction samtang gi-imbestigar sa giingong paglugos sa babaye.
Una niini, miduso og reklamo ang babaye sa Integrity Monitoring Enforcement Group o IMEG sa PRO-7.
Matod ni Montejo, complainant gipaubos na sa custody sa Women and Children’s Protection Center (WCPC) sa rehiyon.
Gitug-an usab sa opisyal nga gipahiling nila ang babaye sa Pink Room sa Vicente Sotto Memorial Medical Center.
Nakita sa imbestigasyon nga ang babaye, nga giingong gibilin lang sa usa ka convenience store sa San Fernando sa iyang ig-agaw, nangayog tabang sa kapolisan nianang alas 8 sa gabii.
Apan nangangkon ang babaye nga inay tabangan, gilugos na hinuon siya sa tulo ka polis dili layo sa station.
Sa iyang bahin, si Col. Engelbert Soriano sa CPPO miingon nga human madawat ang reklamo, iya dayong gimando ang pagkuha sa armas sa tulo ug pagbutang sa camp restriction. (Jhon Tadlip/JTY)
(Source: Police Regional Office 7)