Bigbigbigen dagiti kameng ti Sarrat Ilocos Norte Tricycle Association wenno SINTA ti dakkel a tulong a maipaay kadakuada iti babaen ti Pantawid Pasada Program ti gobierno probinsial.
Inbunannag ni Mr. Elmer Agno, presidente ti nadakamat a gunglo a ti ipaay ti probinsia a sangaribo a pisos a gas subsidy ket kaibatugan ti makalawas nga usarenda a gasolina iti panagpasada dagitoy.
Impalgakna a dakkel a banag daytoy para iti pamilia ti tunggal maysa a benepisiario.
Segun kenkuana, basar iti rakurak ni Gob. Matthew J. Marcos Manotoc, malaksid iti gas subsidy ket maipaayanda pay ti insurance iti ania man nga aksidente a pakainaiganda bayat ti panagpasada dagitoy.
Kabayatanna, inpakaammo ti gobernador a sanga gasut pito pulo ket maysa dagiti benepisiario a trisikelan iti ili a Sarrat.
Immun-una ngem iti daytoy, naipaayan metten ti gas subsidy ken nabunongan ti MINC card dagiti trisikelan ti ili a Pasuquin ken ti siudad ti Laoag.
Kagiddan ti pannakaisayangkat ti nasao a programa ti ili a Sarrat, imbatad ni Gob. Marcos Manotoc a maikalikagum pay ti pannakabakuna ti kontra COVID-19 dagiti amin a driver ti Public Utility Vehicle wenno PUV wenno agpaspasada a luglugan.
Innannugotna a dakkel a problema ti sangsangwen dagiti agpaspasada a luglugan iti daytoy a panawen ti pandemia rason nga ikarkarigatan ti gobierno probinsial a maipaayan dagitoy ti tulong.
(Source: PGIN)