Cagayan de Oro – Mobisita dinhi sa dakbayan sa Cagayan de Oro ang mga dagkong opisyal sa nagkadaiyang embahada sa lain-laing nasud nga pangulohan mismo ni Department of Tourism (DOT) Secretary Maria Christina Garcia-Frasco karong Huwebes, Mayo 23.
Sa iyang mensahe atol sa flagraising ceremony niadtong Lunes, si City Administrator Roy Hilario Raagas miingon nga ang pagbisita ni Secretary Frasco kauban ang mga ambassadors ug mga stakeholders kabahin sa ‘Philippine Experience Program’ kon PEP sa DOT.
Sa miaging bulan, gikompirmar ni DOT-10 Regional Director Marie Elaine-Salvaña Unchuan nga mobisita si Secretary Frasco kauban ang mga ambassadors dinhi sa Cagayan de Oro City.
Ang ilang pagbisita kabahin sa ilang paglibot-suroy sa lain-laing tourism and cultural heritage sites sa siyudad ug probinsiya sa Misamis Oriental ug sa northern Mindanao.
Mahinumduman nga bag-ohay pa lang gipahigayon ang 2nd Mindanao Travel Tourism Expo sa Cagayan de Oro City sa miaging bulan sa Abril.
Gidayeg ni Director Unchuan ang City Hall ubos sa administrasyon ni Mayor Klarex Uy sa ilang pagtabang sa Department of Tourism aron malampuson ang maong kalihukan.
Matud ni Unchuan ang expo nagpamatuod nga ang Cagayan de Oro naila isip usa ka major tourism ug convention destination sa northern Mindanao. Gawas sa Cagayan de Oro ug Misamis Oriental, mobisita si Secretary Frasco uban ang mga foreign dignitaries sa probinsya sa Bukidnon ug Davao Region.
News and photo courtesy of CIO CDO