Surigao City – An Taganito High-Pressured Acid Leaching (THPAL) Nickel Corporation nangandam alang sa ilang tinuig nga environmental initiatives alang sa umaabot nga Philippine Environment Month sa Hunyo 2024.
Sa pagpaabot niining talagsaong panghitabo, an THPAL ug an Department of Science and Technology (DOST) – Caraga, pinaagi sa Provincial Science and Technology Office sa Surigao del Norte, nagpatawag alang sa usa ka coordination meeting sa Provincial Research Innovation and Science Museum (PRISM) sa Surigao City aron hisgutan an mga importanteng bahin alang sa kolaborasyon nga nagtutok sa pagpanalipod sa kinaiyahan.
Atol sa tigum, an THPAL ug DOST nagsusi sa nagkalain-laing mga paagi alang sa panag-iban, lakip an pag gamit sa mga proyekto sa panukiduki ug kalamboan, pagbalhin sa teknolohiya, ug pagpaambit sa kahibalo.
An duha ka partido nagpahayag sa ilang pasalig sa paggamit sa ilang tagsa-tagsa ka kahanas ug kahinguhaan aron matubag ang mga hagit sa kinaiyahan sa rehiyon.
An THPAL ug DOST mag-host isab ug mga seminar nga may kalabotan sa kalikopan ug mga kampanya sa pagpahibayo nga mag-feature sa mga eksperto sa S&T nga magpaambit sa mga bahin sa siyensya sa kinaiyahan, malungtaron nga mga gawi, ug mga teknolohiya nga mahigalaon sa kinaiyahan.
Kini nga mga inisyatibo nagtumong sa paghatag og plataporma alang sa pagbayloay sa kahibalo, mga diskusyon sa labing maayo nga mga gawi, ug ang pagsabwag sa impormasyon sa mga teknolohiya nga may kalabutan sa kinaiyahan.
An pagtinabangay tali sa THPAL ug DOST nagpakita sa importansya sa panagtambayayong tali sa industriya ug mga entidad sa gobyerno sa pagpasiugda sa malungtarong kalamboan. (Ronda 21 Mark James Lisondra, photo credits to the owner)