Malamposong gihimo ang usa ka Rescue Operation sa hiniusang mga personahe gikan sa Philippine Coast Guard (PCG) Substation ug City Disaster Risk Reduction and Management Office (CDRRMO) dinhi sa dakbayan alang sa pagluwas sa usa ka tawo nga nakit-ang nag-utaw-utaw dinha sa dagat, nga medyo nagkalisod na sa paglangoy niini, sa may kapin kon kulang alas 11:30 ang takna kagahapong adlawa, Marso 15, 2021.
Ang maong rescue operation ang walay langan nga gihimo sa nasangpit nga hiniusang grupo, aron sa pagseguro sa kaluwasan sa nasangpit nga tawo, nga giilang si BRYAN STA. MARIA, 34 anyos, nga matud pa taga lalawigan sa Pampanga, ug temporaryong nanimuyo sa dakbayan sa Dapitan.
Sumala pa sa asoy sa responding team, nga sa mga wala pa mag alas 11:00 ang takna sa susamang buntag, usa ka tawo ang nagpahibalo kanila nga siya (Sta. Maria), ang iyang nabantayan dinha sa baybayon sa Dipolog Boulevard, partikular haduol sa tower, ug pag-abot sa pipila ka minutos, mi-ubog na kini sa tubig, busa gibale-wala ra kini kaniya sa pagtuo nga tingali kini maligo lamang.
Dugang pa sa nakakita, nga sulod sa pipila ka mga minutos, wala na kini mibalik sa baybayon, ug hinuon, milangoy kini padulong sa lawod nga bahin sa gibana-banang gilay-on nga kapin kon kulang usa ka gatos (100) ka metros gikan sa baybayon, diin sa ilang dugang paglantaw gikan sa layo nga kini ang nagpa-utaw-utaw nalang.
Tungod niini, sa iyang kabalaka, wala kini maglangan nga midangop ngadto sa buhatan sa CDRRMO nga nahimutang dinha sa Tower, aron mangayo sa pakitabang kalabot niini.
Ug tuod man, usa ka linangkob nga grupo sa PCG ug CDRRMO, ang wala maglangan ug mihimo sa hinanaling pag-responde gamit ang Rescue Boat sa dakbayan, diin kini ang malamposong naluwas ug nadala pagbalik sa kamad-an.
Ang nilangkob nga grupo nga mihimo sa pagresponde gilangkoban nila ni PO2 Resart Jhon Sacatropes (PCG), PO3 Mark Tumpag (PCG), SNI Curt Mojica (PCG), Rafael Regencia Sr.(CDRRMO), Joecer Palma (CDRRMO) ug Kent Ryan M. Tangaro (CDRRMO) tanan dinhi sa dakbayan.
Sa pagpakisayod sa responding team gikan sa hingtungdan, wala pa masayri ang tinuod nga hinungdan kon ngano kini milangoy padulong sa lawod, gumikan kay dili man kini motingog sa dihang kini gipangutana alang sa katin-awan sa panghitabo.
Ning kasamtangan, si Sta. Maria ang gitugyan ngadto sa buhatan sa Department of Social Welfare alang sa tukmang koordinasyon. (City Information Office-afb)