Cagayan de Oro – GITUTOKAN sa administrasyon ni Mayor Rolando “Klarex” Uy pinaagi sa City Local Environment and Natural Resources Office (Clenro) ang gikatahong illegal mining activities sa kabukiran ning syudad.
Sa taho nga nakuha sa Clenro ubos sa pagpangulo ni Engr Armen Cuenca, ilang nasuta nga adunay namatikdan nga mga illegal mining pinaagi sa ilang gipahugtan nga inspection and monitoring activities sa Brgy Pigsag-an ug Tumpagon.
Matud ni Engr Cuenca, dili mohunong and Clenro sa inspection and monitoring sa nasangpit nga barangay aron mapugngan ang paguba sa kinaiyahan ug ang pagkadaot sa Iponan river.
Ang joint monitoring team gilangkoban sa nagkalain-laing ahensya sa lokal ug nasudnong kagamhanan ug Task Force Kinaiyahan.
Kahinumdoman nga milagda og kasabutan o Memorandum of Agreement ang syudad kauban ang Task Force Kinaiyahan niadtong tuig 2013 aron sa pagpanalipod sa Iponan River ug watershed niini.