Bisan pa man sa COVID-19 pandemic nga giatubang, mikita gihapon og kapin P75 milyones ang City Economic Enterprises Department (CEED) basi sa 2020 revenue collection sa merkado sa Cogon, Carmen ug Puerto lakip na sa slaughterhouse.
Si Marfe Dacoco, Officer-in-Charge manager sa CEED, namahayag nga mikunhod sa 15 porsiyento ang 2020 income sa CEED kumpara sa 2019 diin mikita og P89,395,815.17 milyones.
Sa 2019, adunay income nga P55,028,252.46 milyones ang Cogon market; Carmen, P30,836,931.01 milyones; Puerto, P1,559,215.07 milyones, samtang ang slaughterhouse mikita usab og 1,971,416.63 milyones.
Apan sa 2020, ang merkado sa Cogon mikita og P45,358,478.43 milyones; Carmen, P24,084,958.89 milyones; Puerto, P687,855.03 mil, apan misaka usab ang income sa slaughterhouse ngadto sa P5,594,459.02 milyones.
Matud ni Dacoco nga usa sa mga rason nga miubos ang income sa CEED mao ang temporaryong pag-undang sa stall rental ug entrance fees sa tanang merkado sugod bulan sa Marso-Hunyo 2020 pinaagi sa City Ordinance No.13843-2020 tungod usab sa COVID-19 pandemic nga nakaapekto sa ekonomiya ug panginabuhi sa katawhan gumikan sa pagsira sa pipila ka mga kompanya ug establisimento sa Rehiyon 10.
Alayon niini, gipasalamatan sa CEED ang tanang stallholders ug mamaligyaay sa ilang kooperasyon hinungdan nga dili kaayo dako ang pagkunhod sa income. (CIO)