Cebu City – Naglaom ang kadagkoan sa dakbayan sa Sugbo nga padayon nang mous-os ang ihap sa bag-ong mga kaso sa coronavirus disease.
Kini tungod kay namatikdan sa EOC o Emergency Operations Center nga ang inadlawng kaso sa virus nagkaminos sa miaging mga semana.
Si Konsehal Joel Garganera, pangu sa EOC, miingon nga halos tulo ka semana na nga midailos ang mga hitaptan sa Covid 19.
Suma pa ni Garganera, nakakita silag kalamboan sa COVID-19 situation sa siyudad bisag nakatala kinig inanayng pagsaka sa positivity rate.
Iyang gipasabot nga gikan sa 1,104 ka indibidwal nga gi-swab test niadtong Marso 28, mitala ra ug 82 ang positibo, o positivity rate nga 7.43 percent.
Apan mas taas pa kini kon itandi sa threshold sa WHO o World Health Organization nga 5 percent apan dako og kalamboan kon itandi sa 15 ngadto sa 23 porsyento sa nakalabayng mga semana.
Gawas sa pagkunhod sa new infections, ang kadagkoan sa EOC mitumbok sa pag-us-os sa gitawag og critical care utilization rates isip timailhan nga ang pagpanakod sa COVID-19 sa Cebu City nagkahinay na.
(Jhon Tadlip/JTY)
(Source: Emergency Operation Center – Cebu City, photo courtesy of Cebu City Public Information Office)