Cebu City – Mag-atubang ug kasong frustrated murder ang usa ka lalake nga nanigbas sa iyang kainom nga babayeng minyo, kinsa wa mosogot sa tinguha sa lalake nga makighilawas ngadto kaniya.
Sa imbestigasyon sa Medellin Police Office nagtagay ang suspek nga si Vicente Rondina, 56 anyos, minyo, taga Barangay Antipolo, Lungsod sa Medellin lalawigan sa Sugbo ug ang biktima nga si Norma Destacamento, minyo, ug silingan sa suspek.
Gi-ingong mihangyo si Rondina nga makig hilawas ngadto kang Norma apan wa mosogot ang naulahi.
Kini hinungdan nga mikuha ug sundang ang suspek ug gitigbas ang biktima kinsa didto na sa ilang panimalay.
Sa follow up operation sa kapolisan, didto na masikop si Rondina sa bukirang bahin sa Barangay Dalingding Sur, Medellin Cebu.
Nahiagom ang biktima ug unom ka samad tinigbasan sa lawas, bukton ug liog, kinsa gidala ug gi-atiman sa Vicente Sotto Memorial Medical Center (VSMMC).
Nahitabo ang insidente ning naghinapos nga bahin sa kasaulogan sa Women’s Month. (Jhon Tadlip/JTY)
(News & photo courtesy of Medellin Police Office)