Nadakpan sa mga tinugyanan sa kapulisan an lima ka mananagat human nakalapas sa City Ordinance 98 series of 1995 Fishing by the use of Air Compressor o naila nga Boso.
Nakilay.an an mga suspek nga sila ni Colix Barquio Glico, 34 anyos na layaki, Romulo Dominacal Angob, 37 anyos na layaki, Edwin Solomon Hollon, 42 anyos na layaki, Benny Sibial Borja, 38 anyos na layaki, Edward Salinas Buna, 30 anyos na layaki sila upat lumulopyo sa Brgy. San Juan, SC, Reynaldo Precillas Bernante, 57 years old na layaki, residente sa Brgy. Canlanipa, SC.
An mga suspek gireklamo sa Barangay Council sa Brgy. Alegria, Surigao City pinangulohan ni Kapitan Elorde Edillor Ellar, 62 anyos, minyo, Punong Barangay sa Brgy. Alegria, Surigao City. Nasakmit sa posisyon sa mga suspek an Isa ka (1) motorized Bangka (SAVVY and ZION 1) sa kantidad P40, 000.00; Duha ka (2) unit 13HP motor engine sa kantidad P50, 000.00; Isa ka (1) unit nga air Compressor Tank sa kantidad P15, 000.00; 60 metros nga elongated hose sa kantidad P1,500. 00; Tuyo kabuok (3) spear gun sa kantidad P1,500.00; Duha kabuok (2) flashlight sa kantidad P500; Upat kabuok (4) diving mask sa kantidad P2, 000.00; Tuyo pares nga (3) diving Fins sa kantidad P500.00; kapin kon kuyang 7 kilos sa nagkalain-lain nga klase sa isda sa kantidad P1,500.00 sa kinatibuk.ang P112,500. 00.
Sa pagka kuman an mga suspek an jaon sa kustodiya sa Surigao City Police Station. Hampan an kaso gi-refer sa City Agriculture Office sa City Hall Compound, Brgy. Washington, Surigao City. An mga respondents gipamulta ug Php5,000.00 kada isa, nga mokabat sa kinatibuk-ang P30,000.00 isip silot sa Paglapas sa Surigao City Comprehensive Fishery Ordinance no. 98, Serye sa 1995. (Mark James Lisondra)