Si Ponciano Carcallas, 37 anyos, tricycle driver, adunay ka live in parter ug residente sa may Brgy. Purok 5B, Dahican Magallanes, Cabadbaran City ug temporaryong nag-puyo sa (Conjurado Boarding House) sa may Purok Pagatpat, Brgy. Magsaysay, Placer, Surigao del Norte an nakawatan nan kwarta sa waya pa makilay.i na suspetsado.
Matud pa ni Ponciano jadton Hulyo 17, 2024 jaoy isa ka layaki nga ija nakita nga nag ukit-ukit sa may pirtahan sa ija silingan nga kwarto sa Boarding House, apan waya lamang nija pasumbalinga ug kompyansa lamang sija kay nagtoo nga kilaya sa ija ka baordmate, an nag-puyo sa kwarto na diin an suspek nag ukit-ukit sa pirtahan, apan nasayran nga unang nakawatan an ija ka boardmate, sa susamang adlaw nga nakawat an battery sa cellphone.
Hulyo 19, 2024 adlaw’ng biyernes, alas 7:00 sa buntag mipanaw an biktima, aron nga sija mamasahero, pag uli niini sa ija Boarding House sa alas 2:00 sa hapon imbis nga mag huyug na sija sa ija alkansya apan ija nabantayan nga nawaya na an alkansya sa ija mismong butanganan.
Matud pa sa biktima unom (6) ka buyan an ija pag tigum kay ija proseso an ija lisensya, ug matud pa nga dili kini mo minus sa Five Thousand Pesos (5,000) an suyod sa ija alkansya. Panawagan sa biktima nga iuli sa kawatan an kwarta kay ija hinagu-an an kwarta nga pila ka buyan nija tinigom.
Nanghinaot isab ni Mr. Celbert Conjurado, 47 anyos ang Caretaker sa may Conjurado Boarding House nga untana masakpan an kawatan kay aron dili na maka-biktima. (Mark James Lisondra)