Isa ka tindahan sa Purok 1 Tres de Mayo, Brgy. Bad-as, Placer, Surigao del Norte an gilungkab sa waya pa makilay.i nga kawatan human kini naka bunit.
Kita sa CCTV footage an pag suyod sa kawatan human tagbangagan an kisami mga alas 2:40 sa kadlawon kagahapong adlawa ug misaka pagbalik sa kisame mga alas 2:47 sa susama nga adlaw.
Sa imbestigasyon sa kapulisan ngadto na sa tindera nga si Melife Garupil nga sa ija pag abre sa tindahan waya pa kini nija nabantayan nga nabangag na an kisame apan sa pagtan.aw niini sa kaha, nasayran nga waya na an halin sa kantidad P150,000 ka pesos, isa ka laptop ug isa ka android phone.
Dugang pa sa imbestigasyon ngadto kay Junrey Pareja tag ija nan JudRey Rice Dealer nga dili sija mohumong ug ija paningkamotan nga matumbok gajud an suspek. Matud pa ni Mr. Junrey, na bag-o ra nija gitangtang an gwardya kay permi lamang nija maabtan nga natuyog.
Sa pagka kuman padajun pa an imbestigasyon sa mga tinugyanan sa kapulisan sa Placer aron matumbok an responsabling suspetsado. (Mark James Lisondra)