Nadakpan an 29 anyos nga layaki sa gihimong hot pursuit operation sa mga tinugyanan sa kapulisan human nangawat nan motorsiklo nga gipanag-ijahan sa biktimang si Bebelyn Patiga Cellona, 31 anyos nga babaje, menyo, residente sa Purok 4, Brgy. Balibayon, Surigao City.
Nakilay.an an suspek nga si Jerwin Poliran Eviota, 29 anyos nga layaki, ulitawo, wayay trabaho, residente sa Purok 3, Brgy. Villafranca, Gigaquit, SDN.
Basi sa imbestigasyon ni PSSGt. Jonas dela Sierra ngadto na sa biktima nasayran nga kagahapong adlawa Hunyo 18, 2024 mga alas 2:00 sa hapon, nadiskubrehan ni Mrs. Cellona nga an ija motorsiklo nga Yamaha Mio color cyan nga walay plate number nga may chassis number PA0SE9810N0672459 nadiskubrehan nga nawaya hinungdan nga ija ini gi-report sa maong buhatan.
Sa pagkadawat sa taho, an mga personahe sa Surigao City Police Station mihimo ug imbestigasyon ug pursuit operation nga misangpot sa pagkilaya ug pagkasikop sa suspek didto sa lungsod nan Gigaquit SDN pinaagi sa mga personahe sa Gigaquit Municipal Police Station gi-turnover sa City PNP.
Mag atubang sa RA no. 10883 kon New Anti-Carnapping Act of 2016 ug detenado sa Surigao City Police Station. (Mark James Lisondra)