An Sangguniang Panlungsod sa pagpanguna ni Vice Mayor Alfonso Casurra maoy nanguna sa Flag Raising Ceremony sa City Hall kagahapong adlawa.
Highlight sa report ni Vice Mayor Alfonso Casurra amo an mga resolution ug mga ordinansa nga giduso sa konseho ug aprobado na sa Sangguniang Panlungsod.
Unang resolution amo an pag hatag ug otorisa sa Mayor nga musuyod sa memorandum of agreement alang sa pagtukod nan Surigao City Fish Port lakip an Refrigeration Facilities nga nagkantidad ug P200 milyones ka pesos nga ipahimutang sa Magallanes partikular sa Pacemco Port Area.
Ika duha nga resolution amo an P375 milyones ka pesos na loan sa Development Bank of the Philippines alang sa pagtukod nan Swine Breeder Farm sa Barangay Quezon nga gihisgutan kagahapong adlawa sa Sangguniang Panlungsod.
Isa ka resolution nga naghatag isab sa Mayor sa pag apply nan permit sa DENR alang sa City Government of Surigao sa pagtukod ug echo village ug huy-anan sa mga badjao. Ini na proyekto gipundohan sa UN Habitat.
Pasado isab an 54 Annual Budget sa 54 ka Barangays sa siyudad nan Surigao. Gipasalamatan ni Vice Mayor Casurra an City Budget Office sa pagpanguna ni Atty. Jeffrey Galido alang sa pag aproba sa tanan Barangay sa ilang Annual Budget.
Aprobado isab sa Sangguniang Panlungsod an isa ka ordinansa nga mag tukod nan Senior Citizen’s Office, PWD office, Women’s Center ug Teens Desk Center ngadto na sa 54 ka Barangay sa siyudad nan Surigao para didto na mo dangop sa tagsa-tagsa ka mga barangay an mga residente kung jaoy mga panginahanglanon.
Present sa flag raising ceremony sila ni Councilor Joenil Aldonza, Councilor Karl Duane Casurra, Councilor Noel Christian “Toti” Catre, Councilor Baltazar Abian, Councilor Joseph Joey Yuipco ug Sk Federated President Jeanilyn Edulzura. Pinasidunggang bisita isab ni LTCOL Jerold Jale an Commanding Officer sa 30IB Philippine Army nga maoy modawat nan Plaque of Commendation gikan sa City Government.
(Mark James Lisondra)