Gikawat sa isa ka menor de edad an single motor na Honda Wave 100 color puya nga may plate number MS 7119 nga gipanag-ijahan ni Randy Bulabog Puyales, layaki, 48 anyos, menyo, government employee, residente sa Purok 1, Brgy. Canlanipa, Surigao City.
Basi sa imbestigasyon sa kapulisan ngadto na sa biktima naka parking an single motor sa ija bayay ug pagka alas 11:00 nan duyom jadton Hulyo 17, 2024 ija nabantayan nga nawaya na an ija motor.
Nangajo nan tabang an biktima ngadto na kay PSSgt. Jay Ellarina aron makit.an an single motor sa dihang swerte na ila kining nakit.an didto sa Sitio Cayutan, Brgy. Cagniog, SC pagka Hulyo 18, 2024 sa alas 11:00 an takna sa buntag nga gimaneho sa isa ka 15 anyos na menor de edad hampan an kaiban daling nakasibat.
Human sa insidente giturn over an suspek sa Surigao City Police Station alang na sa tumang disposisyon. (Mark James Lisondra)