Nasunog an isa ka bayay nga gipanag-ijahan ni Roel Cometa Recto sa Purok 5, Poblacion, Dapa, Surigao del Norte kagahapong adlawa Hulyo 2, 2024.
Sa report nga gipagawas sa Dapa Fire Station nasayran nga wayay nasalbar nga mga gamit an tag ija sa bayay gumikan kay an nabilin isa ka senior citizen na.
Kaiban sa nasunog an mga gamit sanan tinda sa duha ka tenant sa ubos nan bayay sa tag ija.
Matud pa sa report sa Dapa Fire Station mikabat sa P225,000.00 damyos sa nahitabong sunog.
Sumaya pa ni SFO3 Michael Oraliza an Municipal Marshall nan Dapa nga niabot sa 1st alarm an sunog sabay pahinumdum nga dapat tangtangon an mga nakasaksak nga kagamitan kon dili gamiton.
Na kontrol an sunog mga alas 10:28 sa buntag ug gideklara nga fireout mga alas 10:40 sa buntag.
Duha ka pamilya an apektado ug wayay natala nga naangol sa insidente. Hugot nga gipanawagan sa Bureau of Fire Protection nga pirmamenti susihon an mga butang nga posibling maka sunog. (Mark James Lisondra)