Arestado sa mga tinugyanan sa kapulisan an suspek nga empleyado sa gobyerno human nangaway sa isa ka construction worker sa gipahigayon nga disco samtang gisaulog an kapistahan sa Brgy. Mapawa, syudad nan Surigao nga nahitabo kagaina Agosto 17, 2024 sa alas 12:25 sa kadlawon.
Nakilay.an an suspek nga si Pecto Esidro Nocos, 56 anyos na layaki, empleyado sa gobyerno, residente sa Purok Narra, Brgy. Quezon, syudad nan Surigao.
Giila isab an biktima nga si Nick Rivero Lugsanay, 32 anyos na layaki, residente sa nahisgutang lugar.
Basi sa imbestigasyon sa kapulisan nasayran nga an biktima ug an ija live-in partner nga ginganlag Irene Pejoto Garson nitambong sa maong disco ug nag okupar sa isa ka lamesa.
Samtang nagpadajun an mga kalihokan, an biktima ug an ija live-in partner nga si Irene ni gakos sa lawas aron masiguro na dili matumba bisa pa man sa ilang panaglalis.
Sa pikas nga bahin sa lamesa, an suspek nga nabantayan nga hubog isab nanghilabot sa away sa live-in partner pinaagi sa direktang pagsumbag sa biktima nga naigo sa waya nga bahin sa mata nga miresulta sa pagka samad.
Waya pa makontento an suspek miatake pag isab ngadto na sa biktima apan nakahimo pa kini pagdepensa. Dali miresponde an mga brgy. Tanod ug giturn over ngadto na sa mga miresponding kapulisan. Kasohan an suspek nan Physical Injury ug jaon kuman sa kustodiya sa Surigao City Police Station. (Mark James Lisondra)