Patay an isa ka nurse human kini naghikog kagahapong adlawa sa Purok 8, Barangay San Juan, Surigao City nga nadiskubrehan mga alas 5:45 sa hapon.
Giila an biktima nga si Reyben Mindajao Francisco, 35 anyos na layaki, minyo, ug residente sa nasangpit na lugar.
Base sa report sa kapulisan, duyan an gigamit sa biktima sa paghikog suyod sa ila bayay. Gilayon kini gitabangan sa ija amahan human mabati an singgit sa ija umagad ug gidaya dajon sa hospital pinaagi sa emergency responders.
Pag abot sa Caraga Regional Hospital, gideklarar na dead on arrival an biktima mga alas 6:30 sa gabii pinaagi sa attending physician.
Sa inisyal na imbestigasyon, gituohan nga nakaangkon an biktima nan emotional problem, ilabina na tungod sa panaglalis nila sa ija asawa.
Padajon pa an imbestigasyon sa kapulisan samtang gihuyat an resulta sa post-mortem examination na gihangyo sa City Health Office para matino an eksaktong hinungdan sa kamatayon.