Pormal nang mipailalom sa usa ka oryentasyon ang mga 28 ka mga tinun-an sa kolihiyo og sekondarya nga giilang “poor but deserving students” gikan sa mga nagkadaiyang tunghaan dinhi sa probinsya.
Ang SPES o Special Program for Employment of Students usa ka tinuig nga programa nga gitanyag sa local nga pangagamhanan sa probinsya alang niadtong mga estudyanting buot magpursige sa ila ng pagtuon apan kulang sa pinansyal para makapamalit sa ilang mga kagamitan sa tunghaan.
Usa kini espesyal nga programa ilalom sa pagtambayayong sa mga buhatan sama sa Provincial Public Employment Services Office, Department of Labor and Employment, og buhatan sa Gobernador. Ilalom niini nga programa ang maong mga tinu-an makadawat sa suhulan nga tugbang sa authorized labor rate sa intero Caraga sulod sa 20 ka mga adlaw diin sila pagatun-an sa regular nga mga trabahoon sa opisina kin isa katuyuan usab nga madugangan ang ilang kalam isip preparasyon sa ilang umaabot nga kaugamaon.
Atol niini nga adlaw, komprehensibong gipasabot ni Engr. John Ritchie A. Tangpos, hepe sa DOLE Dinagat Islands ang importansya sa programang SPES og mga mekanismo sa pagkamugna niini, samtang unod sa pakigpulong ni Board Member Gwendolyn Ecleo-Pols atol niini mao ang pag engganyo sa mga kabataan nga pagpadayon sa ilang pagtuon bisan sa mga pagsulay og hagit nga masinati-an tungod kay matud pa anaa kanunay ang gobyerno nga andam magpaluyo sa mga programa alang sa mga kabatan-onan.
Giingon usab ni bokal Gwen nga andawm kanunay ang buhatan ni Governor Nilo P. Demerey Jr, og Bise Gobernador Benglen Ecleo alang sa pagpanday og mga balaodnon para padayon kining mapundohan.
Sumpay niini, si BM Carlos P. Bua, kinsa maoy Vice Chairperson, SP Committee on Labor Employment & Livelihood mipasabot nga kini dakong kahigayunan sa mga studyante alang sa dugang kahibalo sa panarbaho ug maka tabang sa adlaw-adlaw nga gastuhan sa pag eskwela ug sa personal nga panginahanglanon.
Niining mahinungdanon nga adlaw, anaa usab kanunay ang suporta ni Ms. Lucia V. Galabo, MPA isip maoy nagdumala niini nga programa og mao usab ang kasamtangan nga hepe sa Provincial Public Employment Services Office sa Dinagat Islands. (Mark James Lisondra)