Cebu City – Nadakpan na ang nagtago-tago nga kanhi kongresista sa Dinagat island ug lider sa PBMA o Phil. Benevolent Missionaries Association nga si Ruben Ecleo Jr.
Nasikop si Ecleo sa lungsod sa San Fernando, Pampanga kagahapon.
Ang 63 anyos nga si Ecleo gipresentar sa media sa kaulohan ni Major Gen. Debold Sinas, labaw sa NCRPO o National Capital Region Police Office nianang hapon.
Matod pa ni Sinas, gamit ang warrant of arrest sa kasong kurapsyon ilang giarestar si Ecleo.
Sa iyang bahin, si Ecleo namahayag nga gipul-an ug gikapoyan na siya pagtago-tago hinungdang nagpakita na lang siya sa mga awtoridad.
Gawas sa kasong kalapasan sa anti-graft & corrupt practices act, nakombikto usab si Ecleo sa kasong parricide tungod sa giingong pagpatay sa iyang asawang si Alona Bacolod sa brgy. Guadalupe, Cebu City niadtong 2002.
Kon mahinumdoman, ang lawas ni Bacolod gisud og itom nga garbage bag ug gitambog sa bung-aw sa brgy. Curo, Dalaguete, Cebu.