Giaprubahan sa Sangguniang Panlungsod sa Dipolog sa gipahigayong regular session kaniadtong Hulyo 28 ang resolusyon nga naghatag ug pagtugot kang Mayor Darel Dexter T. Uy nga mopirma sa usa ka Memorandum of Agreement tali sa Department of Health Zamboanga Peninsula-Center for Health Development ug Corazon Aquino Hospital alang sa paglugway sa Medical Assistance to Indigent Patients nga adunay kinatibukang kantidad nga duha ka gatos ka libo ka pesos (₱ 200,000.00).
Si Chairman on Education and Culture Konsehal Marilou Calibo ang maoy mipadas-ug sa maong resolusyon ug gidasunan sa tanang SP members.
Ang maong itanyag nga medical assistance ngadto sa mga kabus nga katawhan usa ka programa sa Department of Health (DOH) subay sa DOH Department Order No. 2019-0191 o giilang Guidelines for the Implementation of the 2019 Medical Assistance to Indigent Patients (MAIP), nga makatabang ug daku sa medical nga panginahanglanon sa mga indigent patients. (OIC Lyza Bautista, RPN DXKD Dipolog)
