Cebu City – Mokabat sa 60 ka mga pamilya ang nawagtangan ug panimalay sa sunog nga mi-ulbo sa sikit sikit nga kabalayan sa Sitio Riverside, Barangay, Barangay Subangdaku, Syudad sa Mandaue, alas otso sa buntag, Lunes, Agosto 16, 2021.
Matod ni Subangdaku Barangay Kapitan Ernie Manatad, ang mga biktima sa sunog kasamtangan nga gipa puyo sa Subangdaku Elementary School.
Gipahibaw ni Manatad nga gi-andaman nila ug pagkaon ang mga apektadong pamilya.
Ang Sitio Riverside, diin nahitabo ang sunog, nahimutang dool sa boundary sa Syudad sa Mandaue ug sa Dakbayan sa Sugbo.
Gibutyag ni Senior Fire Officer 1 (SFO1) Filward Morales sa Mandaue City Fire Department nga nagsugod ang sunog pasado alas siete sa buntag.
Sigon pa sa Bantay Mandaue-CDRRMO (City Disaster Risk Reduction and Management Office) nga na report ang sunog alas 8:01 ug na kontrola homan sa 38 minutos.
Ang fire department naka tala ug 25 ka mga panimalay nga naugdaw, samtang sa Bantay Mandaue- CDRRMO mahimong moabot kini ug 30.
Gibana-bana ang danyos nga anaa sa ₱ 250,000.
Padayon nga gi imbestiga sa kabomberohan ang hinungdan sa sunog. (Jhon Tadlip)
(News & phots courtesy of Mandaue City Fire Office | Bantay Mandaue- CDRRMO)