Naghinam-hinam na ang mga kabatan-unan sa probinsya sa Sarangani nga makita ug maisturya ang ilang idolo nga si Ms. Venus Raj. Matigayon kini karon na nga adlaw nga Hwebes, Agosto 19, alas tres sa hapon (3pm), alayon sa usa ka bulan nga selebrasyon sa probinsya sa Sarangani nga Buwan ng Kabataan (bnk2021).
Sa ubang mga LGU, usa ka semana ang ilang pagsaulog. Apan sa Sarangani Province, gihimo kining usa ka bulan gikan pa niaging tuig 2020 ilalum sa administrasyon ni Governor Steve Chiongbian Solon sa iyang Sulong Kabataan program aron mahatagan og sakto nga pag-ila ang papel sa mga kabatan-unan sa kalinaw ug kalambuan sa probinsya.
Si Venus Raj ang gideklara nga Binibining Pilipinas 2010, ug sya pud ang nahimo nga 4th runner up sa Ms. Universe 2010. Sya karon ang national ambassadress sa #NotAlone, programa nga nagtutok sa kaayuhan sa mga kabataan sa entiro Pilipinas.
Himamaton ni Venus Raj ang mga kabataang Sarangan karong Hwebes via virtual aron makapa-ambit sa iyang personal experience nga mahimong giya sa mga kabataan, hilabi na unsaon pagdala sa kalampusan ug kapakyasan sa kinabuhi taliwala sa kalinghod sa pangisip.
Bisitahon lang ang Facebook page sa Sulong Kabataan-Sarangani Province aron libre ma-register ug magka-inter-aksyon live. Katambayayong sa kini nga pinasahi nga presentasyon sa Sulong Kabataan program ang kalihukan gitawag nga Elevate Gensan.
Samtang, daghan pa ang gihan-ay nga mga aktibidad alayon sa Buwan ng Kabataan sa Sarangani Province, sa pagtinabangay sa Provincial Youth Development Office sa pagdumala nila Mr. Bimbo Tablazon, Ms. Chin-Chin Bone ug Ibrahim Nilong, Sangguniang Kabataan Federation sa pamunuan ni Board Member Rheymar Dian kuyog ang mga municipal ug barangay SK chairman, Provincial Youth Development Council, ug mga ideya gikan kang Ma’am Michelle Lopez Solon, ang kapikas sa kinabuhi ni Governor Solon, sa pagsuporta nila Vice Governor Elmer De Peralta, tanang board member, mga mayores bisan na nila Senador Manny ug Congressman Ruel Pacquiao.
Karong Sabado, Agosto 21, mahimong dinapit nga bisita sila Retired Supreme Court Justice Antonio Carpio, Filipino broadcast journalist Ces Oreña-Drilon, TV news anchor Jay Dayupay, ug Ms. Rhoda May Ebad, ang founder sa grupo nga Zero Hunger Alabel. Ilang ipadayon ang ikaduhang bahin sa Youth Vote Matters nga maghisgot sa mahinungdanong parte sa mga kabatan-unan kabahin sa eleksyon ug ang ugma sa Pilipinas.
Niaging Sabado ang unang bahin sa Youth Vote Matters kung diin nahimong resource speakers sila Emil Tapnio, ang youth leadership development specialist gikan sa The Asia Foundation; Kevin Martin Dela Cruz, ang entrepreneur and incubation manager sa Innovation for Social Impact Partnership; Adolf Aguilar, ang DepEd National youth formation division chief; ug ang inila nga social media influencer makita pirme sa Facebook nga si Danieca “Teacher Dan” Goc-ong.
Sunod Sabado, Agosto 28, mahimong resource person sa Youth Vote Matters sila COMELEC national spokesperson Director Atty. James Jimenez; Justin Doctor, ang kanhi nga junior provincial board member; ug si Madelene De Borja, ang convenor sa We the Future Philippines. Gi-konsepto kini sa SSG kon Supreme Student Government nila Kenneth Alviar Rocapor, ang presidente sa SSG sa Malalag Maitum National High School.
Nag-prepara na karon ang mga kabataan sa matag munisipyo sa Sarangani alang sa inter-municipal debate kuyog ang mga banggiitan sa debate taga-Ateneo de Davao Debate Varsity. Andam napud ang Sarangani Writers League sa ilang “KinaBOOKasan” storytelling activity aron padayong pasanayon ang mga kabataang Sarangan sa literatura.
Open competition ang “Sanfila” action research contest pagpili sa nindot nga research paper nga adunay ikatampo sa kaayuhan sa mga kabatan-unan. Muhatag usab og online sports clinic ang Sarangani National Sports Academy ug Sarangani Sports Development Office aron magtudlo sa dula nga badminton, arnis ug taekwondo.
Dili paulahi ang tournament sa Mobile Legends ug mga kompetisyon sa TikTok, vlogging, photo, poster making, quiz show ug daghan pa. Adunay fun games matag adlaw nga daghang pa-premyo ang ipanghatag. I-follow, like and share lang ang Facebook page sa Sulong Kabataan-Sarangani Province.
(Source: Sulong Kabataan – Sarangani Province Facebook page | Provincial Information Office – Sarangani)