Adunay 10 ka COVID-19 patients sa Zamboanga del Norte Medical Center ang naulian ug nakagawas na kutob karong adlawa, Oktobre 21 gikan kaniadtong Lunes, Oktobre 19.
Kaniadtong Lunes, ang upat ka mga COVID-19 survivors mao ang Patient 93, 44 anyos, babaye ug taga Lower Dicayas, Patient 95, 55 anyos, babaye ug taga Turno, Patient 98, 36 anyos, lalaki, taga Central Barangay pulos sa dakbayan sa Dipolog ug Patient 81, 24 anyos, babaye taga Obay, lungsod sa Polanco.
Sa Oktobre 20, adlaw’ng Martes, migawas na usab sila si Patient 70, 59 anyos, lalaki ug taga Sta. Isabel, Patient 85, 68 anyos, lalaki, taga Barangay Sta. Filomena, ug Patient 94, 33 anyos, lalaki taga Galas pulos ning dakbayan sa Dipolog.
Samtang sa Oktobre 21, naulian ug nakagawas na usab sila si Patient 129, 48 anyos, lalaki, taga Barangay Miputak, Patient 130, 59 anyos, babaye, taga Barangay Barra ug Patient 131, 10 anyos , babaye ug lumolopyo usab sa Barangay Barra pulos sakop ning dakbayan sa Dipolog.
Ang maong mga pasyente sadya kining gitagbo sa mga personahe sa ZNMC atul sa ilang paggawas.
Sila nagpasalamat sa Labaw’ng Makakagahum, sa mga doctors, nurses ug uban pang personahe sa maong tambalanan kinsa maoy nagpaluyo sa pag-asikaso sa maong mga pasyente.
Nasayran gikan sa Provincial Inter-Agency Task Force nga kutob Oktobre 21, ang probinsya sa Zamboanga del Norte nakatala ug 145 COVID-19 cases diin 49 ang active cases, 84 ang naulian ug 12 ang nakabsan sa ilang kinabuhi.
Niini, si Dr. Esmeralda Nadela, ang Acting Hospital Administrator sa ZNMC subling nagpahimangno sa publiko nga aron malikayan ang pagkuyanap sa COVID-19, magpundo lamang sa balay kung walay importanteng tuyo sa gawas, batasanon ang paghugas sa kamot gamit ang sabon ug tubig o dili ba mogamit sa alcohol ug hand sanitizer, kanunay magsuot sa face mask ug face shield, magmintinar sa social distancing kung anaa sa pampublikong lugar.
(Provincial Information Center | OIC Lyza Bautista, RPN DXKD Dipolog)