Cebu City- Sa makausa pa, nag-una na usab ang probinsiya sa Sugbo sa labing adunahang lalawigan sa nasod base sa uwahing financial report sa COA o Commission on Audit.
Base sa 2019 Annual Financial Report, gitaho sa COA nga ang Sugbo adunay kinatibuk-ang asset nga P203.9 bilyones.
Kini na ang ikaunom ka sunod-sunod nga tuig nga giila ang Cebu isip labing dato nga probinsiya sa nasod.
Ang uwahing report sa COA nagpakita nga ang total assets sa lalawigan mitubo og 471.9 porsyento.
Niadtong fiscal year 2018, aduna lay assets nga kapin sa P35.6 bilyon ang Sugbo.
Segun sa COA, ang ikaduhang labing adunahang probinsiya mao ang Batangas nga adunay kapin sa P20.7 bilyon nga assets nga gisundan sa Rizal nga dunay kapin sa P20.2 bilyon nga total assets.
Ang ubang nakasakay sa top ten richest province sa nasod mao ang Davao de Oro, Bukidnon, Surigao del Norte, Negros Occidental, Leyte, Palawan, ug Iloilo.
Samtang ang Cebu City nahimutang lang sa ikalima sa labing dato nga siyudad sa Pilipinas base sa samang report.
Suma pa sa report sa COA, adunay kapin sa 34.7 bilyon nga assets ang siyudad diin ang Makati gihapon ang nag-una nga nagbaton og assets nga P233.8 bilyones.
via Jhon Tadlip/JTY
Source: Commission On Audit
Photo: Cebu Provincial Government