Cebu City – Gilabtikan ni Lapu-Lapu City Mayor Junard Chan ang iyang predecessors nga nagduma sa syudad sa iyang gihulagway nga pakyas ug paghikaw sa Oponganon labot maayong healthcare ug social services.
Si Chan sa iyang duha ka oras nga State of the City Address (SOCA) kagahapon, namahayag nga ang kanhi administrasyon pakyas sa pag implementa sa importanteng proyekto sa nakalabay nga 18 ka tuig.
“These are the services that Oponganons have long been deprived because of the undoings of the previous administration. Projects delayed are services denied, matod ni Chan.
Wala hinoon mo higot si Chan ug pangan, pero ang mga opisyal nga iyang gisundan mao ang magtiayon nga si kanhi Mayor Arturo Boy Radaza ug kapikas nga nagsilbi sab nga mayor ug karon ug kasamtangan nga Kongresista sa Lone District ng Paz Radaza.
Ang kampo ni Radaza midumala sa syudad sud sa 18 ka tuig.
Gikompara ni Chan ang iyang pagduma sud sa duha ka tuig nga nakapa human sa first phase ug second phase sa Lapu-Lapu City Hospital nga matod pa sa mayor, angayang mahuman na unta niadtong tuig 2017 panahon sa kanhi administration.
Gawas sa pagpahuman sa hospital building, gibutyag ni Chan nga ang kagamhanan sa syudad mi hire ug mga medical specialist -cardiologist, pulmonologist, infectious disease specialist ug emergency medicine specialist.
Lakip sab ang pag hire dugang ob gyne, surgeon, anesthesiologist, pediatrician ug internal medicine.
Gipahibaw sa mayor nga ang hospital naka perform na ug kapin sa 150 ka caesarian operations, kapin sa 500 ka normal deliveries, dunay 232 ka mga major operations , dul-an sa 200 ka mga minor operations, breast removal gumikan sa cancer ug pagtangtang sa gallstone.
Alang ni Chan nga ang wala mabuhat sa milabay nga 18 ka tuig, iyang nabuhat sulod lang sa duha ka tuig.
Infra ug ubang proyekto
Gibatbat sab sa mayor nga ang iyang administration nakahimo ug 71 ka road concreting projects ubos sa Ahong Cares Bayanihan Project.
Gipaambit niini nga iyang nahatagan ug kasulbaran ang problema sa nagkalapok nga agianan human sa giingong wala kini tagda sa 18 ka tuig, pinaagi kini sa pagbutang ug drainage .
Dugang accomplishment nga iyang gipahibaw ang kasulbaran sa problema sa kuryente sa isla sa Olango sud sa dugay nang panahon.
Naka pang apod apod sab ug nanaud ang kagamhanan sa syudad ug mga solar street lamps ug nanghatag ug solar panel sets.
Socialized Housing
Gilakip sab ni Chan ang sitwasyon sa Barangay Canjulao Reclamation Project, diin ipabarug ang medium-rise socialized housing.
Priority niini, matod sa mayor ang nanimoyo o mga informal settlers daplin sa kabaybayonan sa Barangay Poblacion, Pajo, Pusok, Ibo ug uban pa.
Ang maong lugar duna nay Presidential Proclamation panahon ni kanhi President Gloria Macapagal Arroyo nga usa ka socialized housing site.
Urban Poor
Mahitungod sa Urban Poor, matod sa mayor nga sa iyang pag assume dunay 86 ka mga urban poor organization; sa pagka karon ang syudad anaa na sa 352 ka mga urban poor organization ubos sa Urban Poor Affairs Office.
” Kay ang akong baruganan nagpabilin, nga walay demolisyon kon walay financial assistance ug relokasyon,” sigon pa ni Chan.
Gikompara sab sa mayor ang pagtubag sa hulga ug mga demolisyon kaniadto nga iyang gihulagway nga way puangog ug kasing kasing.
Covid Response ug uban pa
Gi highlight sab sa SOCA sa syudad ang kalamposan sa pagtubag sa COVID-19 pandemic ug vaccination, tourism improvements ug mga initiatives ug pagbutang ug dugang tourist attractions.
Wa sab kalimti sa paghisgot sa mayor ang Assistance alang sa LGBT communities, water projects, ang kalamposan sa 500th years anniversary celebration sa Victory of Mactan.
Dugang gipaambit niini ang aspeto sa employment ug livelihood, peace and order, disaster and emergency response ug sa kalikupan nga natagamtan sud sa duha ka tuig sa iyang administrasyon. (Jhon Tadlip)
(News & photos courtesy of Lapu-Lapu City Public Information Office)