Nakabsan sa kinabuhi na ang usa ka senior citizen nga lolo na mao si Marciano Durano Fernandez, 70-anyos, lumulupyo sa Sitio Timbakol, Brgy. Putat, Tuburan, Cebu, human kini nalumos sa kadagatan.
Ang insidente nahitabo niadtong Disyembre 1, 2024, mga alas 1:40 sa hapon.
Sumala sa imbestigasyon sa Tuburan Police Station, alas 9 sa buntag nakit-an pa ang biktima nga naglakaw-lakaw daplin sa dagat. Apan pagkahuman sa pipila ka oras, nakit-an na kini ni Bryan Paglinawan nga naglutaw na sa tubig.
Gidali kining gidala sa mga sakop sa Andam Tuburan ug Coast Guard ngadto sa Tuburan District Hospital, apan gideklarar na kini nga patay pag-abot didto.
Base sa pasiunang imbestigasyon sa kapolisan, walay foul play nga nalambigit sa kamatayon ni Fernandez. (Renante Socia Lada)