Radio Philippines Network
DXKT Davao News Provincial News

Senior Citizen Gidunggab Sa Makadaghang Higayon, Patay

Davao De Oro  – Giawhag sa Compostela PNP ang katawhan sa lungsod sa pagduol ngadto kanila o sa pagtawag sa selpon number 0948-613-2909 ug 0999-737-9720  kung si kinsa man nakaila sa tag-iya sa paresan sa tsinelas nga kolor blue , kalo ingon man rayban sanglit , ang maong mga butang giingong iya sa suspek kinsa mipatay sa 64 anyos nga babaye didto sa Purok 13, Centennial, Poblacion, Compostela alas 8:00 sa gabii , Disyembre 6, 2021.

Gibutyag nga ang maong mga butang narekober sa mga pulis atol sa ilang pagrespondi sa crime scene  nga sumala pa gituohang nabiyaan sa suspek sa ilang pagsibat human gitusak-tusak og dunggab ang biktima nga si  Gilda Estrada, 64 nga usa ka negosyante kinsa nakahiagom og 14 ka mga samad dinunggaban sa lawas nga miresulta sa hinanaling  kamatayon.

Si PMAJ. Darwin Dura ang hepe sa Compostela PNP , nagbutyag dihang personal nga nahinabi ning tigsuwat nga wa pa nila matugkad ang kinauyukang motibo sa insidente apan, giingong posibleng personal nga motibo  sanglit , way nawalang butang sa biktima sukwahi sa mga na-post sa Facebook nga giingong tulis ang motibo og ang nakuha mao ang selpon sa biktima .

Si Dura nagbutyag nga ang selpon sa biktima ilang narekober og anaa kini karon sa ilang kustodiya.

Ang chairman sab sa dapit nga si Purok Chairman Alejandro “ Ato” Tiempo labihan  ang kaguol og kabalaka sa maong hitabo sanglit, sumala pa niya nga karon lang kini nahitabo nga adunay gipatay sa ilang dapit sukad sa iyang pagpangatungdanan isip Purok Chairman sugod niadtong 2007.

Gibutyag ni Purok Chairman Tiempo nga ang mao nilang dapit, malinawon og ang biktima maayong tawo og wa siya’y nadungog o nabalitaan nga nakabangi o nakabikil niini.

Giawhag ni Chairman Tiempo ang mga katawhan dili lamang sa sa ilang dapit kundi ang tibuok katawhan sa lungsod sa Compostela nga magbinantayon og di magpasaya-saya labi na panahon sa kagabhion.

Subay  sa spot report sa Compostela PNP,  alas 7:40 sa gabii dihang ang biktima nga si Gilda nahuman pagpanira sa iyang sari-sari store , duha ka wala mailhing mga lalaki nakit-ang nagtindog sa ngitngit nga bahin sa dapit og sa kalit  lang  usa sa mga suspek miatake ug gidunggab ang biktima sa makadaghang higayon.

Human sa insidente ang mga suspek nanglakaw nga mipalayo paingon sa wala masayring direksyon.

Samtang ang biktima gidali pagdala sa Davao De Oro Provincial Hospital sa lungsod sa Montevista apan, wa makalahutay og nabugtuan sa gininhawa .

Nagsilbing ebidensiyang gihuptan sa mga kapulisan ang mga butang nga ilang narekober samtang padayong gipahingusgan ang kasulbaran sa maong krimen.
(Michael Manguhig, RPN DXKT Davao OIC)

Related posts

PLDT Fill Service Arrested For Drugs At Purok Waterlily, Sucabon, Brgy. Zone 2, Zamboanga City

RPN

Project SILAW Reached Remote Barangays Of Benguet

RPN

BCPO To Deploy 200 Cops For Holidays

RPN