Gibutyag ni Ms. Raquel Panal, ang provincial social welfare and development officer sa probinsya sa Sarangani, nga natapos na sa pito (7) ka munisipyo sa Sarangani Province ang pang-apud apod sa SAP kon Social Amelioration Program emergency subsidy, gikan sa Maitum, Kiamba, Maasim padulong na sa Alabel, Malapatan, Glan ug Malungon.
Dako ang pagpasalamat ni Panal sa pagtinabangay sa tanan hinungdan nga natuman matud pa sa probinsya sa Sarangani ang deadline nga gihatag sa nasyonal nga gobyerno. Iyang gipasalamatan ang kooperasyon sa mga lumulupyo ug ang pagtambayayong sa mga barangay, municipal ug provincial official, ug sa mga personahe sa DSWD Region 12 lakip na ang PNP Sarangani, hilabi na matud pa ang mga opisyales sa purok ug sityo bisan na ang mga barangay health worker ug day care worker tungod sila ang mas nakaila sa ilang mga silingan.
Marso 31, personal nag-program briefing si DSWD Regional Director Cezario Joel Espejo ngadto nila Governor Solon ug Panal sulod sa Kapitolyo sa Sarangani aron paspas mapahimuslan sa mga katawhan ang social amelioration program. Kumpleto usab nga nitambong sa maong orientation ang pito ka mayor sa Sarangani kuyog ang tanang municipal social welfare and development officer, sa pagsuporta nila Vice Governor Elmer De Peralta, tanang board member ug nila Senador Manny ug Congressman Ruel Pacquiao.
Matud pa sa labaw sa PSWDO Sarangani, dili matago nga adunay mga gabagulbol tungod wala kadawat sa ayuda gumikan usab matud pa kay limitado ang slots nga gihatag. Apan gipamahayag niini nga naka-submit na sila og mga pangalan kadtong kwalipikado apan wala maapil sa natagaan, pamasin nga kung adunay ikaduhang release sa SAP ang sila ang prayoridad nga matagaan.
Naghulat na lang sila karon matud pa sa abiso sa nasyonal nga panggamhanan kung mabahinan ang Sarangani Province sa bag-uhay lang na-aprobahan ni Pangulong Rodrigo Duterte nga dungag Lima ka Milyon (5M) kabuok pamilya nga mahimong additional beneficiary sa SAP emergency cash assistance. Una ng gikataho nga wala nay ikaduhang release sa SAP sa mga lugar nga napailalum na karon sa General Community Quarantine.
Subling gihingusgan sa DSWD nga mag-atubang og mga kaso ang mga indibidwal nga nakadawat og SAP apan sa tinuod diskwalipikado kini basi sa DSWD guidelines. Ang tagaan lang dapat kadtong walang-wala nga apektado sa gipatuman nga mga lockdown.
Samtang, gibutyag ni PSWDO Sarangani Head Maam Raquel Panal nga karong bulana na bulan sa Mayo lauman nga mahatag ang social pension alang sa mga kwalipikadong senior citizen sa Sarangani Province. May nahitabo matud pa nga aberya sa paghatag sa maong ayuda gikan sa nasyonal nga gobyerno gikan niaging tuig 2019 ug karong tuiga tungod gihan-ay pa ang mga listahan gitanggal kadtong nahunusan na sa mga kinabuhi ug gibutang ang mga bag-ong myembro.
Apan sa dili madugay mahatag na matud pa kini sa senior citizen beneficiaries. Ang wala kadawat gikan tuig 2019 hangtud 1st quarter karong tuiga ang adunay paabuton matud pa nga P7,500 ka pesos tingob nga madawat.