Cebu City – Gitugtan na nga makasud sa Cebu Island ang mga travelers nga dili mo presenta ug negative RT-PCR o antigen test result sugod karong adlawa, Oktubre 1, 2021.
Kini maoy unod sa memorandum nga bag-ong gipahibaw ni Cebu Provincial Governor Gwendolyn Garcia, Biyernes, Septembre 30, 2021.
Gipaklaro hinoon ni Garcia, nga kadtong mosud sa Probinsya sa Sugbo kinahanglang mo presenta ug medical certificate nga gi issue sa usa ka doctor ug dunay naka butang nga ang maong traveler walay symptoms sa coronavirus disease (Covid-19).
Ang maong medical certificate, valid lang sud sa 24 oras. “They shall present a medical certificate certifying that they do not exhibit symptoms of Covid-19 disease at the point of origin. The medical certificate should be issued 24 hours immediately before arrival in Cebu,” nakalatid sa memorandum.
Niadtong Septembre 27, gi anunsyo ni Garcia nga ang mga travelers gikan sa Leyte kinsa mo byahe padung sa Pilar, Cebu, dili na kinahanglang mo presenta ug negative Covid-19 test result.
Gibutang karon ang lalawigan sa Sugbo ubos sa general community quarantine (GCQ), lakip na ang Cebu City ug Mandaue City, gikan sa Oktubre 1 hangtud sa 31, 2021.
Ang Lapu-Lapu ubos sa GCQ with heightened restrictions gikan sa Oktubre 1 hangtud sa 31, 2021.
(News & photo courtesy of Cebu Provincial Government)