Wala na gapangita og negative result sa RT-PCR o Antigen test ang pamunuan sa General Santos City Public Terminal sa tanang mga inbound passengers, bisan ang mga maggikan sa ubang rehiyon.
Sa pakighinabi sa RPN DXDX, gipaklaro ni City Terminal Administrator, Jong Facurib, nga subay sa direktiba sa Department of Interior and Local Government, dili na requirements ang maong mga medical clearances gumikan sa “point-to-point” na ang biyahe sa mga public utility vehicles.
Gawas pa niini, nakaplastar usab matod pa ang isitriktong health protocol ug tracing system sa siyudad, batok sa padayong bahad sa Covid-19.
Sa karon, abli na ang pagdawat sa GenSan sa mga pasahero gikan sa ubang rehiyon, sama sa Davao ug Cagayan de Oro.
Alayon niini, aminado si Facurib nga limitado lamang ang ihap sa mga pasahero karong panahon sa Yuletide season, kung itandi sa miaging mga tinuig.