Davao Oriental – Human ang pipila ka adlaw nga kinalutay sa landslide area sa Purok Sangay, Barangay Don Salvador Lopez sa siyudad sa Mati, Davao Oriental, nakadesidar ang mga rescuers nga isuspenso ang retrieval operation sa tulo pa ka missing person.
Mao kini ang napakanaug nga desisyon sa Mati Incident Command Post, Sabado, Disyembre 31, subay sab sa di maayong panahon ug padayong paglihuk sa yuta sa giingong dapit.
Sumala sa report, upat ang gikaingong na lubong sa landslide niadtong Disyembre 28, diin usa niini narekober ug giila nga si Cristituto Magmusa Paglanson, 62 anyos.
Bisan paman niini, nagpadayon gihapon ang pagpangita kay Jethro Paglanson Quilat, 14; Roberto Pelaez Ampo, 52 ug; John Gel Paglanson Casaligan, 15 anyos.
Samtang, padayong giatiman sa Mati LGU ang mga residente duol sa landslide area. (Camille Santos Naraga)
(Source: Provincial Government of Davao Oriental)