Cebu City – Gisuta pa sa kapolisan kon ang napalgang putol nga ulo sa babaye sa Brgy. Looc, dakbayan sa Mandaue iya ba niadtong pataynglawas nga nakit-an sa sapa sa Sitio Kalubian, Brgy. Talamban, Cebu City.
Suma pa sa hepe sa station 5 sa MCPO o Mandaue City Police Office, Major Aldrin Villacampa, ipaubos pa sa autopsy ang ulo sanglit di na man maklaro ang nawong ug hitsura niini kay nagkadugta na.
Matod ni Villacampa, mahimong mailhan ug matino nga usa ra ang tag-iya sa mga putol nga parte sa lawas nga anaa sa usa ka punerarya sa dakbayan sa Sugbo pinaagi sa autopsy.
Gawas sa putol nga ulo, una nang nakapag ang mga tawo sa Looc, Mandaue og putol nga tiil ug kamot nga gitugyan sa punerarya.
Dako ang pagtuo ni Major Villacampa nga iya sa babaye ang nakit-ang ulo kay bisag naupaw na ang ubang bahin pero duna pa pay buhok nga nagpabilin nga taas ug buwagaw.
Napalgan ang putol nga ulo sa baybayon sa Looc, Mandaue sa usa sa mga nagpuyo ala 1:30 sa miaging hapon nga gisud og plastic bag nga puti.
Gipahibawo ni Villacampa nga ilang suwayan pagtan-aw ang video footage sa closed circuit television o CCTV camera sa lugar basin adunay tawo nga naglabay sa ulo ug ubang parte sa lawas sa tawo nga unang napalgan.
Hinuon, nagtuo siya nga gianod lang sa Looc ang maong mga putol nga sa lawas sa tawo kay ang kadagatan sa lugar konektado man sa ubang lungsod ug siyudad sa Metro Cebu.
(Jhon Tadlip/ JTY, photo courtesy of Mapio.net)
(Source: Mandaue City Police Office Station 5)