Davao de Oro – Patay ang usa ka pulis human kini mibangga sa lubot sa usa ka kolor green nga multicab didto sa National Highway partikular sa Purok 3, Barangay San Antonio, Mabini, Davao de Oro alas nuebe y medya, Lunes sa gabie, Hulyo 26, 2021.
Ang Mabini Municipal Police Station miila sa biktima nga si Patrolman Jeswin Navarro Mindo, 25 anyos, ulitawo, miyembro sa Sinag-Alab PNP recruits sa Philippine National Police ug residente sa Barangay Del Pilar sa nasangpit nga lungsod.
Subay sa imbestigasyon sa kapolisan nasayran nga naglawig padulong sa siyudad sa Mati ang multicab nga gimaneho sa usa ka Jerome Antonio Veto, 22 anyos, ulitawo ug usa ka fruit vendor nga taga Purok Malipayon, Bagumbayan, Lupon Davao Oriental, samtang nagsunod kaniya ang motor sa biktimang si Patrolman Mindo dihang kalit kining mihandos sa likod nga bahin sa multicab.
Samdan usab ang sakay sa likod nga bahin sa multicab nga giilang si Sheena Amad, 20 anyos. Gidala pa sa ospital ang biktimang pulis apan wala na kini matabang pa sa mga doktor ug nakabsan gayud kini sa iyang kinabuhi alas dyes traynta y nuebe sa gabie.
Naa na karon sa kostudiya sa kapolisan ang driver nga si Veto lakip ang multicab niini ug ang motorsiklo sa biktimang pulis. Dugang imbestigasyon gihimo na usab sa Mabini Municipal Police Station sa nasangpit nga panghitabo.
(Source: Davao de Oro Police Provincial Office)