DAVAO CITY – Waay interes ang Provincial Government sa TADECO” Kini ang hugot nga pahayag ni Provincial Officer Paterno Lucero Pacquiao atubangan sa mga sakop sa Media atol sa unang adlaw nga selebrasyon sa Press Freedom Month sa Davao del Norte. Mao usab kini ang pagklaro ni Davao del Norte Governor Edwin “Kuya Gob’ Jubahib may kalambigitan sa isyu sa TADECO human matod pa gisulayan pagtanggal ug pagguba ang mga bio-hazard facility didto sa Davao Prison and Penal Farm sa lungsod sa Sto. Tomas, Davao del Norte sa miaging semana.
Sumala ni Pacquiao nga duha lang ka butang ang katuyoan sa gobernador sa gihimong lakang ug kini mao ang pagproteksyon sa sagingan ug ang pagpanalipod sa katungod sa katawhan sa maong dapit.
“Walay interes ang provincial government nga ilogon ang TADECO o unsa may interes sa saging,” matod ni Pacquiao. “Proteksyonan nato ang kasagingan!” dugang ni Pacquiao.
Gani subay niini, giplanohan na ang pagbutang og bio-security sa tanan nga mga entry/exit points sa Davao del Norte, ug dili ngadto sa tunga nga bahin susama sa kasamtangan nga biosecurity. Matod pa ni Pacquiao nga mahinungdanon kaayo nga samtang wala pa nakasulod sa sagingan, aduna nay nakamontar nga footbath.
Dugang pagpasabot ni Pacquiao nga ang punto sa probinsyal nga panggamhanan nga maaksyonan ang daghang mulo sa mga tawo bahin sa pag-agi sa dalan sanglit tuyok na man kaayo ilabi na panahon sa mga emerhensya. Nagtuo si Pacquiao nga unfair sa bahin sa bag-ong gobernador kinsa mibarog alang sa katungod ug interes sa katawhan nga siya pa ang himoong dautan.
“Ang provincial government maguol kung mawala ang sagingan kay asa paingon ang mga tao? Unsay ikahatag nga trabaho sa gobyerno?’ Wa na gani nakahatag ang provincial government og trabaho, isira na hiuon ang sagingan? Di ba katok!’ tubag ni Pacquiao sa alegasyong may nagpahiping intensyon ang probinsya nga isarado o dauton ang maong sagingan. “Atong buhaton ang duha: proteksyonan ang sagingan, ang interes sa mga tao ihatag. Mao nay tumong ug tuyo sa kagamhanan ni Kuya Gob Edwin”.
Karong adlawa ang ulahing adlaw nga tagal nga gihatag sa Provincial Government ngadtu sa kadagkuan sa Tagum Agricultural Development Company kun TADECO aron sila na mismo ang boluntaryong matnggal sa mga nakaharang sa Swing Beam, Guard House ug mga gate nga nakabutang sa Provincial Road nga nahimutang sa Tulalian, Bugtong Lubi, El canto, bobongon nga mga sakop sa lungsod sa Sto. Tomas ingon man sa Provincial Road nga nahimutang sa Tanglaw nga sakop sa Braulio Dujali.