Cebu City – Giawhag sa local nga mga opisyal ang mga stakeholders nga mag matngon sa ilang baboyan nunot sa pag-angkon sa kagamhanan sa Ormoc City, Leyte sa unang kaso sa mananakod nga ASF o African Swine Fever sa ilang dapit.
Ang PVO o Provincial Veterinary Office nakadawat og verified information kagahapon bahin sa kaso sa ASF sa Ormoc.
Sa iyang text message sa mga tigbalita, si Dr. Mary Rose Vincoy, provincial veterinarian, miawhag sa matag usa nga magmaigmat ug ireport dayon ang dili kasarangang kamatayon sa mga baboy sa ilang lugar.
Hinuon, gipasalig ni Vincoy sa mga stakeholders, ilabi na sa mga nagbaboyan ug pork producers, nga ilang ipatuman ang hugot nga border control ug disease surveillance sa probinsiya.
Suma pa ni Vincoy, ang tanang livestock transport carriers lakip sa mga meat vans kinahanglang naghupot og Provincial Livestock Transport Pass ug sa pagsud sa Cebu kinahanglang mopaubos sa pito-ka-adlaw nga downtime period ug disinfection.
Hinuon, pagkakaron, libre pa sa ASF ang Sugbo ug tibuok Central Visayas sanglit ang Ormoc sakop man sa Eastern Visayas o Region 8.
Base sa uwahing report sa PSA o Phil. Statistics Authority, ang  multi-billion nga hog industry sa Region 7 ang giilang labing dakong supplier sa baboy sa nasod. (Jhon Tadlip/JTY)
(Source: Provincial Veterinary Office-Cebu Province, photo courtesy by Rafael Orillano)