Gipasalig ug giklaro sa Police Regional Office 7 (PRO7) nga wala’y ni-resign nga pulis sa ilang grupo human sa pagdakop kang kanhi Presidente Rodrigo Duterte.
Sumala sa opisyal nga pamahayag ni PBGen. Redrico Maranan, Regional Director sa PRO7, nagpabilin ang pagka-profesyonal ug dedikasyon sa kapulisan sa Central Visayas. Gipunting niya nga ang mga pulis padayon nga nagpatuman sa ilang katungdanan ug wala maapektuhan sa mga isyu politikal nga naglibot sa kaso ni FPRRD.
Base sa rekord sa Regional Personnel and Records Management Division, wala’y bisan usa ka resignation letter nga nasumite gikan sa mga pulis sa nagkalain-laing estasyon ug unit sa PRO7.
Dugang pa, usa ka imbestigasyon nga gihimo sa Anti-Cybercrime Group nagpakita nga walay tinuod nga pulis nga nag-post sa social media bahin sa ilang pagbiya sa PNP. Nasuta nga kini nga mga pagpanglimbong gibuhat lang sa usa ka sibilyan nga social media user.
“Our absolute loyalty is to the constitution, the flag, the country, and the people,” segon ni PBGen Maranan.
Gipahinumdoman sab niya ang tanang kapulisan nga magpabiling alerto, matinud-anon sa ilang serbisyo, ug magpakita og integridad sa ilang mga katungdanan. (Renante Socia Lada)
(Source: PRO7- PIO)