CAGAYAN DE ORO CITY- ubos karon sa imbestigasyon sa otoridad ang linya sa telepono nga maoy gigamit sa pagpanghulga sa principal sa Misamis Oriental General Comprehensive High School (MOGCHS) niadtong nakalabaying adlaw. Ang maong eskwelahan nahimutang sa dalan Velez ning syudad sa Cagayan de Oro.
Human sa maong pagpanghulga, gikansela gilayon ang mga klase aron sa pagseguro sa kaluwasan sa mga estudyante. Nasayran nga usa ka anonymous number ang nadawatan sa principal niadtong Lunes nga nag-ingon. “A bomb will explode inside your campus at exactly 1:00 PM many students will die”, rason nga gikansela gilayon ang klase ug gireport sa otoridad ang maong text message.
Matud pa ni Police Captain Ernesto Sanchez, ang hepe sa Police Station 2 sa Cogon nga kon mailhan na ang naghimo sa maong pagpanghulga, mag-atukang sa kaso silong sa PD 1727 o pagpakatag sa mga way kamatuorang impormasyon o pagpanghulga may kalabutan sa bomba o explosibo.
Nag-awhag usab ang kapolisan sa katawhan nga ireport gilayon kanila ang susamang panghitabo kon aduna pa ug dili magkompyansa alang sa kaluwasan sa katawhan.