Adunay 200 ka retirees, pensioners, survivors ug mga aktibong miyembro sa kapolisan dinhi sa Zamboanga del Norte ang nakapahimulos sa “PNP Makatao Malasakit on Wheels” Caravan nga gipahigayon sulod sa Zamboanga del Norte Police Provincial Office, Camp Hamac, Sicayab ning dakbayan sa Dipolog kaniadtong Nobyembre 11 niining tuiga.
Sa pagpakighinabi ni Police Colonel Ronald Briones, ang Provincial Director sa ZNPPO, kini ang nagkanayon nga ang maong programa tuyo nga gihimo sa PNP aron maserbehan ang mga retirees ug ang mga aktibong miyembro sa kapolisan sa ilang kinahanglanun ilabi na niining panahon sa pandemya.
Sa Rehiyon 9, nahidangat mismo dinhi ang Caravan Team nga gipanguluhan ni PLTCOL. Maria Imelda Serrano, ang Deputy Chief sa Regional Health Service 9 aron sa pagpahigayon sa maong kalihukan.
Dugang pa ni Police Colonel Briones nga ang mga benepisaryo niini maka-menus sa pamasahe padulong sa dakbayan sa Zamboanga ug aron usab sa paglikay sa COVID-19 tungod kay ania na dinhi ang mga serbisyo nga ilang gikinahanglan.
Ang “PNP Makatao Malasakit on Wheels” Caravan nagtanyag sa serbisyo sa Activation of 1st Monthly Pension alang sa retirees, Application for PNP/Retiree ID ug ang pag-release niini, Issuance of Letter of Introduction, LTOPF Application ug uban pa.
Samtang adunay usay health services sama sa pagpangibot ug ngipon, health awareness seminar/orientation, pagpahigayon sa psychosocial first-aid and stress debriefing/lecture.
Adunay usay gipanghatag nga first-aid kits, electric decontamination sprayer alang sa Provincial Health Service Teams ug ang supplements alang sa mga personahe sa maong buhatan.
Gihimo ang maong programa sa tibuok Rehiyon 9.
Niini, si Police Colonel Briones nagpasalamat sa kadagkuan sa rehiyonal nga buhatan sa PNP nga gipanguluhan ni Brig General Jesus Cambay, Jr.
(Provincial Information Center – mbmontederamos)