Hinikayat ni Pangulong Rodrigo Duterte ang lahat ng mga kapatid na muslim sa buong bansa na isabuhay ang mga aral at palalimin pang lalo ang pananampalataya nila kay “Allah”.
Iyan ang buod ng mensahe ng Pangulo bilang pakiisa nito sa pagdiriwang ng taunang Eid’l Adha o Feast of Sacrifice ng mga kapatid na muslim.
Sa kaniyang mensahe, sinabi ng Pangulo na isa sa mga halimbawa aniya ng malalim na pananampalataya kay “Allah” ay ang pagkukusa ni Ibrahim na i-alay ang buhay ng anak niyang si Ishmael, masunod lamang ang kalooban nito.
Binigyang diin pa ng Pangulo na ang Eid’l Adha ay hindi lamang nagtuturo ng personal na pagsasakripisyo kung hindi ito rin ay ang isang uri ng pagsuko sa nakatataas na siyang higit na nakababatid kung ano ang makabubuti para sa lahat.