Zamboanga del Sur – Gipadayag ni Zamboanga del Sur Governor Victor J. Yu adlawng Lunes nga nabati sa kadaghanan ang kausaban ilabina na sa peace and order panahon sa administrasyon ni Presidente Rodrigo Duterte.
Atol sa SONA virtual streaming event sa provincial government, gibungat ni Gov. Yu nga dili lamang sa kampanya kontra droga ug batok sa kriminalidad makita ang maong kausaban apan lakip na sa padayong pakigbisog sa kagamhanan batok sa insurgency.
“For the past 5 years (of President Duterte’s administration) , we really feel the big improvement sa atong peace and order, not just on the war on drugs but to include war on criminality and the fight against insurgency,” sigon sa gobernador.
Ilawom sa pamunuan ni Presidente Duterte, nigamit og whole-of-nation-approach ang kagamhanan aron masulbad ang insurhensiya sa nasud pinaagi sa EO 70 kun pag-implementar sa NTF-ELCAC (National Task Force to End Local Communist Armed Conflict).
Sa maong pamaagi, dili lamang nakadepende sa kasundalohan ug kapulisan ang paghatag solusyon sa lima ka dekadang suliran sa rebeldeng komunista apan giapilan na kini sa mga ahensya sa gobyerno lakip na ang mga pribadong sektor.
Kahindumduman nga ilawom sa Duterte administration, usa ang Zamboanga del Sur sa gideklarang insurgency-free tungod sa nagkahiusang paningkamot sa katawhan ug gobyerno aron batukan ang mga kalihukan sa NPA ug mapahiluna ang mga mitahan og balik sa sabakan sa gobyerno.
Daghang pondo ug proyekto usab ang gibubo sa Zamboanga del Sur pinaagi sa ELCAC diin giapod-apod kini sa mga kalungsuran ug kabarangayan nga naapektuhan sa armadong pakigbisog.
Gibutyag ni Presidente Duterte sa iyang SONA nga pinaagi sa ELCAC naestablisar ang mga farm-to-market roads, water and sanitation areas, health stations ug mga livelihood initiatives.
(Source: ZDS Press Bureau, photo courtesy of Victory Zamboanga del Sur)