Padayon ang paglantaw ni konsehal George Goking, chairman sa komite sa trade and commerce, nga mapatuman ang gisitar nga minimum health protocols sa mga establisamento human sa pagsaulog sa Semana Santa.
Gipasabot ni Goking nga ang iyang gibuhat dili sa pagsita sa mga kliyente o konsumante nga mosulod sa mga establisamento kun dili ang paglantaw sa mga angayan pang ipatuman sa sistema nga dili makahasol sa tanan.
Sa milabayng semana, gisusi sa konsehal ang pagpatuman sa Higala App QR Code nga matod pa nakaapekto sa operasyon sa mga negosyante ug mga konsumante.
Dili ako supak sa pagpatuman sa QR Code kay usa man kini sa mga pamaagi sa contact tracing apan gikinahanglan nga adunay koordinasyon sa mga negosyante aron usab kini makapangandam, dugang ni Goking.
Sa hingpit nga pagpatuman sa QR Code, si Goking mihangyo nga unta mahatagan sa kahigayonan nga makasulod ug makapalit pinaagi sa pag-logbook. (Sangguniang Panlungsod – CdeO)