Human gibaraw na sa GenSan-Sangguniang Panlungsod, dayon ang pagpahigayon og sabong sa Apopong Gallera ug Calumpang Round Garden Gallera karong bulan sa Abril.
Kini human mihirt og konsiderasyon si City Councilor, Atty. Franklin Gacal nga tugutan ang maong aktibidad.
Atol sa 70th regular session, una nang midesisyon si SP presiding officer, Vice Mayor Ton Acharon nga “denied” ang proposed resolutions kabahin sa derby event, subay sa bagong National-IATF Resolution No. 103, asa gibawal ang operasyon sa mga sabungan, gumikan sa nagtaas nga kaso sa Covid-19.
Apan sa hirit niini, gipasabot ni Gacal nga taman lamang sa April 4 ang “effectivity” sa IATF Resolution 103, gani, dili na sakop ang maong aktibidad nga ipahigayon karong April 8, 15, 22 ug 29 sa Apopong ug ang scheduled 2-cock derby sa Calumpang karong April 5, 10, 17 ug 24.
“So in fairness to them, considering that they have been closed and were only able to operate for one month, I believe that fairness dictates that we should allow them, considering that this Resolution 103, applies only until April 4,” ang tipik sa manifestation ni Gacal.
Una na usab gikuwestyon ni City Councilor Rosalita Nuñez kon nganong kinahanglang i-deklara pang “urgent matters” ang sabong.
“I am actually surprised, why cockfight.. what’s the urgency of a cockfight?”
Alayon sa apela ni Gacal, girekonsidera sa SP ang pagapruba sa maong proposed resolutions. (John Rey Somido)