Gipanghingusgan sa tigdumala sa General Santos City Central Public Market ang desisyon nga ipadlock ang ubang entry ug exit gates sa palibot sa merkado publiko, luyo sa reklamong gipasang-at sa pipila ka market stall owners ug mismong mga market goers.
Atol sa pagtambong niini sa regular session sa Sangguniang Panlungsod, gipasabot ni public market deputy administrator Benjamin Salgado nga nasubay sa gipatumang health protocol sa siyudad ang maong lakang, taliwala sa padayong bahad sa Covid-19.
Dugang pa ni Salgado, kulang ang ihap sa ilahang mga personahe nga magbantay aron masiguro ang pagtuman sa publiko sa gitakdang minimum health standards.
“Nag-implement lang mi kung unsa ang gimando sa IATF. So for now, i-open namo na kung mo-provide sila (stall owners) og manpower,” ang pamahayag ni Salgado.
Nasayran usab nga adunay 36 ka mga gates sa palibot sa merkado, gani, lisod matod pa nga mabantayan kini sa tanang panahon.
“Ang ato man gud, ma-kontrol nato ang entry sa tao. Ang uban man gud, ang face shield, gibutang sa ulo. Dili kaayo ma-avoid nga daghang gahi og ulo. Labi na ang atong stall owners,” ang tipik sa pamahayag sa opisyal. (John Rey Somido)