Cagayan de Oro – Gipahibalo sa kadagkuan sa Boulevard Management Team nga gidid-an na ang mga bisikleta ug pagbisikleta sulod sa Rio de Oro Boulevard sugod karong adlawa.
Si Atty. Jose Edgardo Uy, chairman sa Rio de Oro Boulevard mipasabot nga na-obserbahan nga ang mga bicycle riders nga migamit sa boulevard nga alang unta sa pangpa-relaxed ug pagpahayahay apan gihimo na hinuon kini nga racetrack sa walay pagpakabana sa mga pedestrians (elderly, kababayen-an, kabataan, joggers, ug promenaders) nga migamit usab sa boulevard nga maoy hinungdan sa mga aksidente ug kasamok sa malinawon nga paggamit sa kadaghanan sa maong lugar.
Matud ni Atty. Uy nga daghan na nga higayon nga gipasidan-an ug gibadlong ang mga bicycle riders kalabot sa dili luwas nga paggamit nila sa boulevard apan gibalewala lamang nila kini.
Ubay-ubay na usab ang naaksidenti nga mga pedestrian gumikan sa mga bicycle riders nga naglumbaanay sulod sa boulevard.
Nunot niini, gimandoan ang mga security guards sa pagpatuman ning maong direktiba uban sa tabang sa mga personahi sa Roads and Traffic Administration (RTA), ug kapulisan nga na-assigned sa maong lugar.
Gilauman usab nga motabang ug makigtimbayayong ang mga barangay tanod gikan sa mga barangay diin nasakop ang boulevard.
News and photo courtesy of CIO CDO