Dead on the spot ang usa ka lalaki human kini gipusil sa wala mailhing suspetsado kaganihang alas 8:00 kapin kun kulang sa gabie, Mayo 2, 2024 sa Purok Salingsing 2, Balintawak, Pagadian City.
Giila ang biktima nga si Junbert Cabatas Idiang, 27 anyos ug usa ka gwardiya.
Sigon sa saysay sa mga nakasaksi, nag-inom matud pa ang biktima uban ang tulo ka mga lalaki nga kauban niini sa trabaho.
Samtang, taliwala sa ilang pagpinasahay ug baso aduna matud pay ka-video call ang biktima ug kalit lamang adunay nibutho nga wala mailhing indibidwal ug sa walay langan gipusil si Idiang sa makadaghan nga higayon sa nagkadaiyang bahin sa iyang lawas.
Gani, gitiwasan matud pa kini sa suspetsado ug sa dihang nasiguro nga wala na kini nagginhawa pa, dali kining nipalayo sa wala masayring direksiyon.
Subay sa inisyal nga taho, siyam ka mga basyo sa bala ang na-rekober sa crime scene.
Nagpadayon pa karun ang gihimong imbestigasyon sa mga kapulisan labot sa nasangpit nga krimen.
(Source: Pagadian News Daily)