Nasakmit sa mga tinugyanan sa PDEA Zamboanga del Sur ang P3.4MILYONES nga kantidad sa shabu gikan sa duha ka mga suspek sa gipahigayong buy-bust operation sa Purok Narra, Barangay Lumbog, Margosatubig, Zamboanga del Sur bandang alas-6:00 sa gabie, adlawng Dominggo, Agosto 25, 2024.
Kauban sa mga kapulisan sa Margosatubig Municipal Police Station ug 2nd Zamboanga del Sur Provincial Mobile Force Company, malampusong nakuha ang maong droga gikan sa usa ka Marecil Maloc aka “Ating”, 42 anyos nga sari-sari store vendor ug Jason Codion, 20 anyos nga bao-bao driver – parehong nalista isip High Value Individuals (HVI).
Anaa na sa kustodiya sa PDEA 9 Regional Office, Brgy. Balintawak, Pagadian City ang mga confiscated items alang sa eksaminasyon, samtang ang mga naarestong suspek gidala sa Margosatubig Municipal Police Station ug gidiretso sa PDEA 9 Regional Office alang sa dugang imbestigasyon.
Gidayeg ni Zamboanga del Sur Gov. Victor J. Yu ang maong malampusong operasyon sa PDEA ug PNP ug padayong mipadayag sa iyang suporta sa anti-illegal drug campaign sa gobyerno.
Gipasidunggan usab ni PRO-9 Regional Director PBGEN Bowenn Joey Masauding ang maong accomplishment sa law enforcement agencies ug mipasalig nga padayong ipatuman ang ilang batok sa pagkuyanap sa illegal nga droga sa rehiyon.
(Source: Victory Zamboanga del Sur)