Direktang gipanganlan ni Gov. Victor J. Yu ug 1st District Cong. Divina Grace Yu ang mga personalidad nga adunay koneksyon sa pagbusikad sa lungsod sa Tukuran kaniadtong September 17, ning tuiga, atol sa gipahigayong press conference adlawng Sabado, Disyembre 7.
Sumala sa statement ni Gov. Victor J. Yu nga subay sa nigawas nga resulta sa initial investigation nga gihimo sa kapulisan, na-identify ang mga suspek sa explosion nga sila – “Abdul” nga kanhi leader ni Labangan Mayor Ed Relacion ug usa ka Alfredo “Butch” Dumanjug nga first cousin ni Tambulig suspended Mayor Charlotte Panal ug residente sa Lower Usugan, Tambulig, Zamboanga del Sur.
Ang Nasangpit nga duha ka mga suspetsado mao usab ang naunay nga mabuthan sa maong bomba.
Samtang sa pamahayag ni Cong. Divina sa media, gibutyag niini nga upat ka adlaw human sa insidente, mismong si Labangan Mayor Relacion ang nitawag kaniya ug kang ZSPPO Director Restituto Pangusban ug niingon nga ang nasangpit nga bombing giplano para kanila ni Gov. Yu ug ang nangunay niini mao si Mayor Charlotte Panal.
Gawas pa niini, nasayran nga ang White Fortuner nga gisakyan sa mga suspek ug nakita sa CCTV maoy sakyanan nga dugay ng gigamit ni Tambulig Mayor Panal. Nakapangalan ang maong sakyanan sa usa ka Elsa Navarro nga nailang suod nga higala sa mayor.
Pag-admitar ni Cong. Yu nga human sa panghitabo giisip lang nila nga isolated ang maong insidente ug namasin nga usa lamang ka pagbuto sa dinamita ug gipasagdan ang PNP nga mohimo sa imbestigasyon. Apan naalarma sila human makita ang resulta sa imbestigasyon diin hinay-hinay nga nasumpay ang mga detalye ug personalidad nga posibleng involved sa insidente lakip na ang gibungat ni Mayor Relacion ngadto kang Cong. Divina pinaagi sa phone call.
Midangop na sa National Anti-Terrorism Council ang magtiayong Yu tungod kay dili usa ka ordinaryong kaso ang maong nahitabo nga explosion sa Tukuran. Sumala sa ilang parehong pamahayag nga mi-request na sila sa Council nga “i-designate” isip terorista ang mga personalidad nga sila Mayor Charlotte Panal ug Mayor Ed Relacion lakip na ang mga suspek aron makahimo ang Council sa ilang kaugalingong imbestigasyon. Sa laing bahin, gi-order usab sa national PNP ngadto sa PRO9 nga hataga’g special attention ang nasangpit nga kaso.
Atol sa emergency meeting sa Provincial Peace and Order Council, nahisgotan nga gipangandaman na karon ang pag-build up sa maong kaso aron i-file sa prosecutor batok sa maong mga personalidad nga nalambigit sa nasangpit nga explosion sa lungsod sa Tukuran.
(Source: Victory Zamboanga del Sur Facebook page)