Zamboanga del Sur – Padayong gitutokan sa administrasyon ni Governor Victor Yu ang kampanya niini batok sa cigarette smuggling sa Zamboanga del Sur pinaagi sa pagpatuman sa Provincial Ordinance No. 051-2021.
Subay sa maong ordinansa nga namugna kaniadto pang bulan sa Marso ning tuiga, usa ka Task Force ang gimugna aron molihok sa mga tahas sama na lamang sa pagdawat og mga report sa cigarette smuggling ug pagpahigayon og regular monitoring sa probinsya labot sa nasangpit nga illegal activity. Gipangunahan kini sa Task Force Head nga mao ang PNP Provincial Director.
Gawas sa Task Force, nakalatid usab sa ordinansa ang presensya sa Provincial Enforcement Team nga gilangkuban sa 3 ka police officers sumala sa rekomendasyon sa Provincial Police Director, 2 ka personahe gikan sa Provincial Health Office ug Provincial Treasurer’s Office, 2 ka miembro gikan sa PLGU ug 2 ka personahe gikan sa Coast Guard.
Ang enforcement team magsilbing deputized enforcers sa ordinansa diin pwede silang modakop sa mga violators uban sa pag-asistir sa kapulisan kung asa nahitabo ang paglapas sa kamanduan.
Sumala sa PNP reports, kaniadtong Septembre 8, mobalor sa ₱ 1.7 milyones nga smuggled cigarettes ang naharang sa usa ka checkpoint sa Brgy. Baloyboan ning siyudad sa Pagadian. Samtang mokabat sa ₱ 786,000 nga kantidad sa ilegal gihapon nga sigarilyo ang nakumpiska sa lungsod sa Josefina ning milabayng semana, Oktubre 16.
Sa mga naunang pahayag ni Gov. Yu, pursigido siya nga sumpuon ang mga ilegal nga kalihukan sa Zamboanga del Sur ilabina ang padayong paglusot sa smuggled cigarettes sa lalawigan nga dakong ganse alang sa ekonomiya tungod kay wala kini magbayad og buwis sa gobyerno.
(Source: ZDS Press Bureau, photo courtesy of Victory Zamboanga del Sur)